政情：新舊工商黨平衡共存

經濟動力「4L」林健鋒、梁君彥、梁劉柔芬同劉皇發，○八年離開自由黨另起爐灶，分拆成另一支議會工商界力量，同舊戰友自由黨形成直接競爭局面。眾所周知，經濟動力與港府關係友好，過去兩年，公職一個接一個，好似林健鋒先後獲委任做西九管理局成員同盛事基金評審委員會主席，梁君彥冧莊擔任職業訓練局主席咁，不過，特區政府還特區政府，中央點諗，又係另一回事。

同列中聯辦上賓

消息稱，喺中央眼中，經濟動力同自由黨都係工商界黨派，有助拉攏商界，中央希望兩黨平衡發展，唔會插手干預，更遑論會扶一邊、壓一邊，以免議會工商界力量又回復到自由黨一黨獨大嘅年代。○八年前，自由黨手握立法會關鍵十票，叱咤一時，儼如工商界唯一代言人，如斯局面，自由黨固然欣喜，但對中央嘅港澳工作大局，卻易尾大不掉，難以駕馭。○三年廿三條立法一役，自由黨前主席田北俊喺最後一刻「跳船」，令立法功敗垂成，就係最深刻教訓。

過去兩年中聯辦一直喺經濟動力與自由黨之間玩搖搖板平衡力遊戲，明知港府獨愛經濟動力，中聯辦無放棄自由黨，好似去年同今年嘅農曆新年，均安排田少率領自由黨一眾骨幹到中聯辦拜年，一團和氣。去年八月副主任黎桂康更陪同自由黨骨幹遊西藏，保持緊密聯繫。直到最近政改大戰，中聯辦副主任李剛召開商界「誓師大會」，自由黨、經濟動力同列上賓，自由黨主席劉健儀亦以航運及交通界立法會議員身份出席，反映中聯辦呢套權力平衡，方興未艾，在未來一段可見日子，呢套政策都唔會改變。

建制派政黨嘅生命線，相當部分掌握喺中央手中，呢個係香港嘅政治現實，中央政策傾斜與否，直接影響經濟動力與自由黨未來興衰，依家中央嘅天秤兩邊均等，係龍係蛇，就睇兩黨自己嘅修為同造化嘞！