中環出更：李大壯讚Mac機好用過PC
台灣最大「蘋果體驗店」Studio A集團尋日喺銅鑼灣開首間旗艦店，身為「港台經濟文化合作協進會」副主席、「香港——台灣商貿合作委員會」主席嘅李大壯，都有嚟支持老友、Studio A集團總經理關恒君（Steven），又幫手剪綵，認真唔話得！
拒評富士康事件
李大壯話自己係IT迷，五、六年前已經轉咗用蘋果嘅電腦，大讚好易用，而且又好少要好似PC咁重新裝過啲程式，所以好方便，仲話咁多年都未試過遺失重要資料添。依家佢同囡囡都轉晒用蘋果電腦產品，Mac、iPod、iPad都齊晒，電話就梗係用iPhone啦，仲使問！
Steven話今年想喺香港再開多兩間，不過佢哋係過江龍，好多嘢都唔熟，所以好多謝李大壯呢個地頭蟲，幫佢打咗唔少電話做安排。講到佢哋集團董事長、郭台銘細佬郭台強缺席開幕禮，Steven話因為郭董喺台灣有活動在身，分身唔到過嚟香港，並唔係因為富士康事件而避席，李大壯亦同老友同一口徑話唔識點講，唔想評論。