中環出更：包陪麗撐雕塑展名人齊捧場
去年冧莊做多三年藝術中心監督團主席嘅已故船王包玉剛三女包陪麗（Cissy），早兩日喺香港藝術中心嘅包氏畫廊，為中國當代著名雕塑家瞿廣慈嘅個展《飛天使者》舉行開幕禮，Cissy好多名人老友都嚟捧場，好似新地董事郭炳湘太太李天穎（Wendy）咁，大家仲戴上藝術家朋友送嘅眼鏡，玩個不亦樂乎！
Cissy喺美國同日本讀藝術，唔止藝術造詣高，份人仲好有義氣。話說身為已故船王包玉剛三女嘅佢，當年喺美國讀書，一啲都唔計較身份，經常同貧苦藝術家群埋，有次仲攞咗500美元請佢哋去唐人街食大餐。同Cissy做咗朋友廿年嘅藝術家蛙王郭孟浩都有嚟今次嘅展覽，佢講笑話當年佢哋個個藝術家都好似營養不良咁，Cissy嗰餐飯直頭係幫佢哋補充營養。所謂「得人花戴萬年香」，當日嘅飯香，蛙王到今日都仲記得。
孖郭李天穎戴青蛙鏡
蛙王仲攞咗自己造嘅青蛙眼鏡嚟送畀朋友，個眼鏡造型玩味十足，同Cissy套衫唔係好襯，但佢無拒絕朋友嘅誠意，仲同老友郭李天穎一齊戴住玩，咁無架子，卓妮都要寫個服字！
鄭家純愛將、新世界中國地產執行董事方承光孖住靚靚藝術家老婆商蕾一齊嚟。方生話佢嘅藝術感係由太太啟發，方太做咗室內設計師廿幾年，讀Fine art出身嘅佢，希望喺三年內開個展。
方承光讚妻不愛名牌
依家歐元水低，係旅行好時機，平時忙到暈嘅方生想同太太出去玩吓，佢仲盛讚太太唔多鍾意名牌，所以去到名牌林立嘅歐洲都無有怕。
記得年頭官司纏身嘅陳振聰臨判決前都不忘去中環ifc掃番件Moncler羽絨着，原來Moncler老闆娘正係Joyce創辦人郭志清嘅女兒馬美儀（Adrienne），當晚佢都有嚟睇展覽。Adrienne話，Moncler唔係淨係得羽絨，依家夏天好多上衣同薄褸都好靚。
Adrienne係瞿廣慈fans，屬蛇嘅佢仲買咗一件叫《金蛇》嘅作品返屋企做擺設。不過Adrienne笑言自己無蛇咁幸福，家吓忙緊新project；如果可以好似蛇咁有得冬眠放幾個月假就正啦！
卓妮