國以民為本，民以食為天，食以安為先。然而，本港食物安全監察系統漏洞多多，過去兩周，至少有二十八名市民進食鮮帶子或扇貝後懷疑中毒，澳門、廣東亦出現類似個案。
帶子、扇貝、蜆、螺等都是市民最愛的「平價海鮮」，也是最易吃出中毒問題的貝殼類海鮮。事件發生至今已十多天，食衞局仍束手無策，直接戳破港府所謂「擁有一套嚴密的食物安全監察系統」又係「吹水」，一味自我感覺良好。事實是，早在二○○五年，本港數十人進食帶子後中毒，因欠缺申報海產來源機制，自是沒法查出毒素來源。不過，當時已有聲音要求規管，可惜政府依然闊佬懶理。
如今出咗事，政府才舊事重提，食衞局才決定推出《食物安全法》條例草案，要求進口商保留入貨單據至少三個月，以備追查食物源頭。政府在食物上把關不嚴，彰彰明甚。政府唔出事就唔提法案，次次「亡羊補牢」、「賊過興兵」，好唔過翹埋雙手乜都唔理幾多。
據美國華盛頓特區的藥物研究所的一份報告指出，美國成年人每年患腹瀉一點四次，其中四分之一患病與不潔食品有關。該報告估計，每年有九千一百萬人次因食用不潔食品而患病，但有些專家認為這個數字仍然偏低。事實上，吃海鮮中毒的事件時有所聞，除了立法規管，食衞局應多抽調人手巡查海產樣本，注意有沒有走私海產，嚴加監管，才可防患於未然，不要待市民吃出事，才說三道四，樣樣話唔知。
周一鑊身為食物及衞生局阿頭，究竟有冇主動同內地有關當局溝通呢？周局長，你走多一步，我哋食得安心。