政情：尖不甩筍工享高薪

兩鐵合併後，百年老店九廣鐵路公司搖身一變成為收租公司。最近九鐵出年報，顯示九鐵總裁詹伯樂「尖不甩」舊年年薪高達二百六十幾萬元，比起○八年多咗五十萬元，仲以為「尖不甩」加薪兩成幾，睇真啲原來包含約滿酬金。只係管理一間空殼公司，就有咁高嘅人工袋袋平安，呢份工都好筍啫。

○七年十二月初兩鐵合併後，九鐵名下資產以租賃形式，交港鐵營運，而「尖不甩」自此獲財經事務及庫務局局長陳家強領導嘅九鐵管理局委任為九鐵總裁，任期兩年，負責九鐵日常管理工作嘅閒職，聽九鐵職員講「尖不甩」已獲續任。

睇番○九年年報，「尖不甩」舊年年薪共有二百六十多萬元，當中已經包含一項約滿酬金。「尖不甩」只係收吓租，每年就有過二百萬年薪，真係羨慕死不少每日為口奔馳嘅打工仔。不過，如果同○七年「尖不甩」近五百萬元年薪相比，就真係差好遠。