政情：橄欖金勞詹「潮團」熱爆
暑假仲有兩個月先到，但身為潮州「架己冷」嘅陳鑑林（橄欖）同詹培忠（金勞詹），已發起喺七月底到潮汕旅遊三日，結果反應熱烈，迅即有十四個議員報名，而且拖兒帶女，除咗橄欖、李慧琼、李鳳英同陳健波一家幾口參加外，陳茂波、黃定光、王國興、劉皇發、潘佩璆、黃容根、謝偉俊、張學明、梁劉柔芬都攜眷出席，「架己冷」又有，其他籍貫嘅議員都有興趣，夾埋超過三十人參與行程。
按初步行程安排，首日會先到潮陽食個午飯，然後轉往汕頭，晚飯後會前往潮州，並入住東山湖溫泉渡假村。
第二日則會遊覽潮安及潮州名勝古蹟，吃過午飯之後再前往澄海及揭東縣，第三日會分別前往普寧及惠陽遊覽，聞說行程期間仲會與當地官員會面啦！
同樣作為「架己冷」嘅陳健波好期待今次旅程，佢話好懷念潮州幾層厚嘅蠔餅，又讚潮州牛丸超香，總之會盡情享受今次潮州美食之旅。