政情：董耀中赴論壇惹轉會疑雲
經濟復甦，但部分中小企經歷金融海嘯後仍然吊緊鹽水。經濟動力尋日喺會展搞咗個「後金融海嘯——發揮中小企動力論壇」，講吓求存之道，吸引一班中小企老闆去聽書，入場觀眾中，竟然有自由黨董耀中。心水清嘅人都知，自由黨同經濟動力已分道揚鑣，董Sir單拖去撐場，莫非有意轉會？
董Sir聽見「轉會」兩個字就笑話：「唔係！嚟聽吓都好，（論壇）對成個商界都有益。」佢唔擔心被誤會想轉會，因經濟動力冇向佢招手喎；佢話自己仲係自由黨人。董Sir一直得前自由黨主席田北俊力撐任旅議會總幹事，助其進軍立會，可惜上屆立會選舉以九票之差輸咗畀謝偉俊，惟有專心做旅議會工作。尋日現身經濟動力論壇，莫非靜極思動？
論壇由經濟動力議員林健鋒（Jeffrey）做主持，佢話起用綠黃兩色做主色，皆因佢欣賞世界盃勁旅巴西隊，對方擅長三角短傳，正好似經濟動力咁，為中小企融資問題，周旋喺政府同銀行之間，總之喺度晒佢哋嘅成績表。