政情：建制派飯局狠插煲呔曾
煲呔曾自把自為單挑公民黨黨魁兼「五區公投運動聯合委員會」總發言人余若薇進行電視辯論，未埋牙已惹來建制派及其他泛民打爛醋埕，批評佢厚此薄彼。中聯辦副主任李剛更首次評論電視辯論，口講就話「尊重」煲呔曾，但按內地術語理解，相當於唔多認同咁解。建制派飯局尋晚更喺上海總會「開飯」夜會煲呔曾，大家趁機群起攻之，今次煲呔曾洗濕個頭，唔知點收科？
李剛：「尊重」曾蔭權
李剛尋日喺中聯辦記招回應「曾余辯論」。李剛冇話表示支持，只係話邀請電視辯論，充分體現特區政府想借這個機會，讓全港市民進一步闡述政改方案，體現特區政府希望政制發展向前前進；至於用甚麼方式，這是特區政府嘅事，中聯辦表示尊重。
李剛唔好意思同煲呔曾打對台，建制派就老實不客氣。建制派飯局尋晚七時開始，共有30名議員出席，首40分鐘大家先摸底，再與煲呔曾共進晚宴。煲呔曾坐落無耐，匯賢智庫葉劉淑儀上前遞請願信，批評政府既然不承認「五區公投」，為何邀約余若薇辯論？又表示應該搞個群英會，不應兩陣對決。
葉太打開帷幕，自由黨劉健儀、工聯會葉偉明等十幾個建制派議員紛紛起哄發難。第一個發炮係王國興，佢話煲呔曾自打嘴巴，一時力斥公投違憲，一時又以五區公投運動總發言人身份邀請余若薇辯論，邏輯矛盾，王反建議煲呔曾，一係就嚟立法會同59位議員辯論，一係叫民主派自己協商代表，唔好搞欽點。
「金勞詹」詹培忠都喺會外一針見血話，煲呔曾單挑邊個有佢嘅自由，但中央講明唔承認「五區公投」，煲呔曾竟然以五區公投運動總發言人身份邀請余若薇辯論，係咪想公然挑戰中央先？煲呔曾必須向中央及市民交代！
面對「槍林彈雨」，煲呔曾喺會上回應，話知道自己單挑余若薇係螳臂當車，個人榮辱無所謂，但希望感動港人，明知今次政改過到機會好微，才出到呢招喎。
尋日建制派飯局前，全國政協常委陳永棋出席個論壇時忍唔住發炮，批評煲呔曾搞辯論抬舉咗余若薇，批評五區公投投票率極低，證明余只屬少數派，無法代表大多數泛民人士，唔明煲呔曾點解要搵余上陣，棋哥仲寸爆煲呔曾：「呢啲可能係高招啦！」
受煲呔曾「寵幸」嘅公民黨，尋日卻開列新條件，要求煲呔曾將辯論提早到６月６日進行，讓市民盡早了解政改方案嘅正反論據，仲巴閉到搵埋主持人。煲呔曾腹背受敵，騎虎難下，難怪有部分建制派議員話等睇戲囉！