中環耳目：趙世曾父女「搵食」唔同路
卓能主席趙世曾同囡囡趙式芝（Gigi）父女感情好好，兩人經常結伴出席公開場合，原來佢哋合拍到連食嘢都冇代溝，仲同卓妮一致推介法國餐廳。不過身邊女伴換不停嘅趙世曾搵食都要貪新鮮，佢鍾意開幕冇耐嘅金鐘Cafe Gray Deluxe，年輕嘅Gigi反而推介歷史悠久嘅半島酒店Gaddi’s。
早前卓妮喺沙田馬場撞到趙氏兩父女，趙世曾拖住新女友隋麗娜入場，一派瀟灑樣。卓妮同佢講起食經，原來佢都有新歡，就係位於金鐘全新酒店The Upper House頂樓嘅Cafe Gray Deluxe，勁讚佢哋嘅生牛肉他他（Ta Ta Steak）水準唔錯，龍蝦都做得好好。不過佢唔記得酒店同埋餐廳名，要稍後問過Gigi至醒起。
卓妮轉頭同Gigi傾起心中至愛食肆，估唔到佢又係推介法國菜，果然係父女同心。Gigi鍾意幫襯已有半世紀歷史嘅半島酒店二樓Gaddi’s，每次去都食佢哋嘅Tasting Menu。間餐廳係香港知名嘅老派法國餐廳，環境氣氛十分優雅極致，同Cafe Gray Deluxe嘅時尚風格大異其趣。
