中環出更（一）：馮家彬娶新抱田二少晒老西
自由黨上周辦喜事，金匯投資主席兼自由黨常委馮家彬低調娶新抱，喺君悅筵開多席，富貴黨友空群出動飲喜酒。馮老爺娶新抱，成晚笑唔停，可惜佢同一對新人一樣，見到鏡頭就怕醜，於是焦點落咗喺自由黨中常委田北辰身上。佢以一套新出爐嘅「G2000 Black Label」閃令令西裝，成功搶鏡，省靚自家品牌。
家族品牌新貨着上身
馮家彬係已故證券大王馮景禧得力助手，喺金融界名氣響噹噹，佢公子Victor迎娶美女Christy，雖然擺酒當晚落起微微細雨，成班「自由人」畀足面到賀，包括自由黨前主席田北俊伉儷、田二少、副主席方剛伉儷、前副主席莎姐周梁淑怡及老公周明權、自由黨區議員方國珊等。馬會主席陳祖澤伉儷、全國政協常委陳永棋都嚟戥馮生高興。
咪以為去飲只有女士會扮靚，田二少都唔執輸，揀咗套銀灰色西裝襯彩藍色呔。呢套係家族品牌G2000出品，面世只有一星期，由意大利製造，質料屬全羊毛，但一啲都唔焗，最特別係布料有閃令令效果。田二少話，呢種料嘅西裝，其他牌子起碼賣萬零蚊，呢套盛惠二千八，抵到爛喎！
賣完廣告後，二少預告暑期有好節目。三女田植鏘喺波士頓完成工商管理碩士課程，六月戴四方帽，二少打算同太太、四女齊齊參加畢業禮。
原來，二少同唔少父母一樣緊張子女學業，講明最低限度要有大學學位，三女生性，攞埋名牌大學碩士銜頭，算有交代嘞。呢位田家千金非常獨立，唔想靠老竇，寧願出外闖天下，依家已獲大公司羅致，好叻女。
同場仲有足總董事余錦基（Lawrence），佢都計劃外遊，稍後起程去南非睇世界盃，心水隊伍係德國、巴西同阿根廷。卓妮講起早前球圈爆出打假波醜聞，Lawrence話，事件好影響香港足運，希望年輕人繼續熱愛足球喎。
卓妮