政情：邱副學林D9做錄音機
政制及內地事務局局長林D9林瑞麟出咗名嘅人肉錄音機，不過林D9嘅播帶功力竟然傳咗畀運輸及房屋局副局長邱誠武。話說運輸及房屋局局長鄭汝樺外訪，邱副尋日做替工上立法會回答議員質詢。喺六條口頭質詢中，有四條關運房局事，包括港鐵股息及票價優惠、房屋政策、政府土地發展政策及港珠澳大橋等。
點知邱副只係不斷重複事先準備嘅答案，好似房屋政策嗰條，會計界陳茂波、勞聯李鳳英同工聯會王國興先後追問邱副會唔會將喺港鐵收到嘅股息，為殘疾人士同弱勢社群提供交通補助，不過邱副一律「一稿走天涯」，跟住事前準備嘅標準答案照讀，話收取到嘅股息要收歸庫房，但政府會鼓勵港鐵提供票價優惠喎。
邱副做副局後，經歷過的士堵塞機場、遷拆菜園村等事件，畀人鬧到飛起，搞到佢做事愈來愈驚青，依家學埋林D9做錄音機，激到個個議員聽完回覆都加多句：「佢冇答到我問題！」而且無論點追問，最終都係聽佢播多一次帶，講咗等於冇講。