港鐵主席錢果豐尋日喺一個論壇上又重提復建居屋，佢認為政府有責任復建居屋，協助工作咗五至十年嘅專業人士及大學生置業。
錢果豐認為，復建居屋協助市民置業，對整體社會發展有利，希望政府同市民喺復建居屋方面能夠達成共識。不過，錢果豐提醒政府，調整樓市政策絕不能好似去街市買菜或睇一、兩日股市波動咁去做，亦唔可以做得太多或做得太少，必須恰到好處。
對於市建局及政府分別推出措施規管一手樓銷售，錢果豐認同有關措施有需要，而且作為企業好應該好應該支持，咁先至對得住消費者喎！
佢仲話，喺呢個「後金融危機」時期，企業要講多啲公益，關注社會和諧，唔應該再容許貪婪、逐利嘅行為。提一提讀者，錢果豐係前行政會議成員。