政情：政壇Stephy決戰維園阿哥
公社兩黨策動變相「公投」搞到政府要花近一億五千萬元進行立法會補選，煲呔曾團隊狠批補選係浪費公帑，但係煲呔曾轉個頭竟然請咗民選南區區議員Ronald陳岳鵬出任特首辦特別助理，咁即係又要嘥錢去搞補選。
政府將會就Ronald原先嘅南區區議會薄扶林選區議席空缺安排補選，呢個選區以中產同公務員選民居多，Ronald原本又係匯賢智庫嘅人，若果匯賢派個四正啲嘅出嚟選，好有機會攞番個位。
葉劉都講明會派人出戰，但仲未決定人選，只係話呢個人出自名牌大學，大家以前都見過吓佢嘅。葉劉承認，佢「六大門徒」唯一女將、「富貴版鄧麗欣（Stephy）」Karen錢嘉韻係其中一個考慮，Karen喺名校加州大學栢克萊分校修讀法律後回流返港，仲係自薦收歸葉劉門下。
Karen有乜對手？社民連維園阿哥任亮憲但求出位，今次係黃金機會，事實上，佢都已經表態話會參選喇。