政情：高靜芝睇好招行前景
香港貿易發展局尋日舉辦中國企業領袖年會香港論壇，過百企業領袖同埋專家學者共聚一堂，探討商業增長新動力。貿發局主席蘇澤光（Jack）全程參與，並同大家分享當年派駐北京嘅懷舊經歷。
招商銀行行長馬蔚華亦都現身說法佢經營銀行嘅創見，在座嘅財匯局主席高靜芝（Sophia）被馬蔚華打動，話要返去入番啲招行股票至得！
招行一向以業務創新受到企業界敬重，馬蔚華回憶七、八年前首次喺內地推出信用卡嘅過程，又提到前年斥資百幾億元跨境收購本港永隆銀行，佢嘅創舉總是引起市場驚呼，佢認為作為商界領袖好應該「把握宏觀，把握趨勢」。
馬蔚華：趁低要買咯
Sophia好誠心咁聽咗成個上晝，佢話喺咁多位嘉賓之中，佢對馬蔚華嘅印象就最深刻，直呼睇好招行未來嘅發展，話返去要入番啲招行股票！我哋將Sophia嘅心得話咗畀馬蔚華聽，佢好開心咁笑謂：「現在股價那麼低，當然要多買一點啦！」