政情：李剛打開破冰之門

溝通擴大團結面

據悉，呢次「破冰」之舉，係由分管港澳事務嘅最高領導喺三月「兩會」後向中央提出方案，最後由中央最高領導人同意有關方案，付諸實行。中央認為，喺啱啱過去嘅補選中，民主黨願意與「公投派」嘅公民黨同社民連分道揚鑣，顯示民主派已不再處於○五年綑綁狀態，中央亦應利用如此良好契機，同泛民「溝通派」破冰溝通，擴大團結面。

重過程多於結果

中央嘅立場相當清晰，重視過程多於結果。即係話破冰後係咪釣到魚已經唔重要，更重要係坦開胸懷，打開門同泛民交流；即使今次雙方未能就政改方案達成共識，以後仍然可以保持接觸和溝通。所以中央對溝通內容對外公開亦無強烈反彈，而下周「破冰」見面帶出嘅意義就更具象徵性。

消息話，中央又與普選聯達成共識，同意會面喺5.16補選後進行，但中央協調小組決定循序漸進安排中央官員與普選聯接觸，所以先行選派中聯辦副主任李剛破天荒見普選聯代表。

記得○四年討論政改方案時，中聯辦亦曾經喺三月底安排民主派人士入中聯辦面談，當時民協馮檢基、民主黨涂謹申同何秀蘭欲強闖北京，向人大常委會就《基本法》附件一、二釋法表達意見，中聯辦主動約見化解，安排喺中央官員中屬司局級嘅中聯辦研究部部長曹二寶喺中聯辦大樓內會見三人。

下星期中聯辦見普選聯嘅規格，明顯不可同日而語，由位居副部級嘅李剛開門見客，層次更高，顯示中央對今次「破冰」會面嘅重視，屆時中聯辦法律部部長馮巍亦陪同與會。今次歷史性會面暫定喺下星期四舉行，到時中聯辦門外肯定又一番熱鬧。

至於普選聯尋晚開完會後，對同中央官員會面安排依然三緘其口，用鐵筆都撬唔開，話時、地、人都未定，又話尋日開會，只係為今日見政制及內地事務局局長林瑞麟作準備喎。