中環出更：MINOVA裁縫來港為一哥度身
西裝要啱身，度身訂造最合心。「阿一鮑魚」創辦人楊貫一都鍾意訂造老西，不過「一哥」口味獨特，佢御用嘅裁縫每年由英國來港幫佢做衫，夠晒巴閉。
一哥向來講究衣着，每次訂造恤衫都指定喺衫袖繡上自己大名，尋日出席一個品牌頒獎禮，更一絲不苟，穿上一套價值逾三萬元嘅英國MINOVA名牌西裝，配埋一條由明星朋友送贈嘅法國Rykiel Homme間條領呔，成個紳士咁款。
聞名英國上流社會
香港人對MINOVA呢個牌子可能有啲陌生，一哥話，MINOVA喺香港暫時未有專門店，但喺英國上流社會非常聞名，以布料矜貴見稱。MINOVA對尊貴客戶照顧周到，派裁縫由英國來港為VIP客人度身，再將新衫運抵香港，一哥已訂咗三套嘞。
一哥仲鍾情有一百七十七年製錶歷史嘅瑞士積家錶（Jaeger-LeCoultre），呢款錶據聞連英女王伊利沙伯二世都係捧場客。一哥手上嗰隻購自六年前，全球限量發售二百五十隻，當時售價係二十萬，不過眨吓眼已升值到四十萬銀嘞！