中環出更：田少獨特菜遠牛飯夠矜貴
旅遊發展局主席田北俊經常與家人坐豪華遊艇出海玩樂，居於港島山頂嘅田少，慣常會開跑車到佢嘅遊艇停泊所在地西貢Hong Kong Marina遊艇會，食飽飯然後出海，或者叫定美食帶上船。遊艇會餐廳The Terrace中西美食應有盡有，仲特別接田少嘅「柯打」，炮製出田少菜遠（西冷）牛肉飯。
西冷扒切片落鑊
呢碟碟頭飯賣相普通，其實牛肉來頭好勁。田少要求大廚將二百幾蚊一塊嘅Marbling Sirloin（牛後腰肉）西冷牛扒切片，然後當平常牛肉片咁炒，而調味亦順應佢口味少鹽少醬油，飯面加多隻煎荷包蛋剔走蛋黃，就係咁，獨一無二嘅田少菜遠牛肉飯就熱辣辣、香噴噴咁擺喺佢面前。
至於餐廳嘅西餐，田少除咗推介烤西冷扒，仲有焗美國豬扒飯。豬扒選用美國黑毛豬，雖然身價不及食橡果大嘅西班牙伊比利（Iberico）黑毛豬，但肉味一樣香濃嫩滑，成為整個焗豬扒飯嘅靈魂所在。田少仲特別提起經常被人忽略嘅餐包，佢話廚師會預先搓好麵團，有客人柯打就即刻焗製，保證新鮮，熱辣辣送餐湯特別好味。
用餐唔少得葡萄酒，當日田少隨手帶咗支法國Burgundy（布根地）特級葡萄園Jadot Chevalier Montrachet Les Demoiselles嘅1990年白酒，支酒稱得上特級佳釀，價錢約三千多港元，市面已買少見少。唔講唔知，原本餐廳只招待會員，但後來為加快食物銷售流量以保持食物新鮮，於是喺一年前改變經營模式，開放招待外來客人，令生意節節上升。
卓妮