政情：周總港鐵搞集體回憶
港鐵中環站出口，差唔多貫穿成個中環，大熱天時，唔少中環人喺食飯時間，都喜歡喺呢個「地下城」穿梭，事關曬少啲，又可以涼吓冷氣，遇啱落雨仲唔使開遮，超方便！身為港鐵行政總裁嘅周松崗，早幾日喺香港會食完飯，一出嚟就向旁邊嘅港鐵站直行。
周總話自己都係港鐵乘客，平時返工泊低架車，就會搭港鐵線出入，到收工先揸番架車返屋企。除咗夠綠色之外，依家港鐵好多個站頭都放有藝術品畀繁忙嘅都巿人欣賞，周總話佢自己行過都會留意吓。
西港島線已上咗馬動工，路線將由上環站向西伸延至堅尼地城，到時會喺西營盤、香港大學、堅尼地城設地下車站，全長約三公里。
周總覺得西環一帶好有特色，港鐵計劃緊放啲舊香港特色嘅藝術品喺新起嘅沿線車站，等呢區嘅乘客可以喺搭港鐵時緬懷吓呢啲香港人嘅集體回憶。
話時話，港鐵好似無代言人喎，仲有年幾就完成任期嘅周總，講得咁興致勃勃，唔知會唔會考慮吓轉一轉工作崗位呢？