近年樓價高企、民怨升溫，煲呔曾早前喺答問大會上，話會用五個月諮詢各界對資助市民置業嘅意見，明眼人一睇就知道佢係想拖延時間，難怪疑似下屆特首候選人、行政會議召集人梁振英（ＣＹ）前排再做煲呔曾團隊嘅「黑羊」，撰文力撐復建居屋，當煲呔曾嘅諮詢無到。
之後煲呔曾一直冇出聲，以為佢會就咁算數，非也！尋日煲呔曾上電台，一講起居屋就酸溜溜話，ＣＹ對樓房市場方面都有一份執着，「講咗好多嘢」，擺明係窒ＣＹ太口多。
咪住！佢仲未講完喎。煲呔曾跟住話：「不過佢亦係行政會議成員嘅一分子，對呢件事所有討論，都要喺行政會議發生嘅。」即係話畀ＣＹ知，行會遲啲都要傾，叫ＣＹ唔好喺度打對台喇；總之講嘢就句句有骨，好似老闆發警告畀啲員工咁。
ＣＹ公開同政府唱反調屢見不鮮，都唔係咩新聞囉，要怪就只能怪煲呔曾無力駕馭！