政情：駱家輝訪港名人爭睹風采

中總會長蔡冠深、廠商會永遠名譽會長陳永棋、合和太子爺胡文新都話未見過Gary，今次係慕名而嚟；總商會立法會代表林健鋒就話幾年前同對方有一面之緣，今次係久別重逢。港美兩地有時差，Gary搭完長途機，竟然毫無倦容，見到名人攞部相機埋身要求合照，笑容滿面，來者不拒。

做得商務部長，Gary此行率領龐大貿易代表團訪華，擺明為美國谷生意，尋日櫈都未坐暖，就同商務及經濟發展局局長劉吳惠蘭簽署合作諒解備忘錄，將美國五十個州嘅美酒帶到香港，又以英語落力推銷「清潔能源」呢門生意，希望與香港及中國打開合作之門。係咪成事，就要睇Gary牙力嘞。

稱唔會做總統

大會設有問答環節，棋哥單刀直入，問Gary會唔會做下屆美國總統，Gary笑言：「No, I am too old！（不會，我太老了）」Gary謙稱做總統要有特別才幹同魅力，佢好享受依家嘅職位，閒來湊吓孫算嘞。