政情：普選聯晤喬老爺等陣先
五區補選落幕，投票率破低點僅得百分之十七點一，顯示激進路線無市場，亦為泛民「溝通派」普選聯同中央打開溝通之門營造有利氣氛。綜合各方消息，中央的確有意同普選聯直接見面，但最敏感係會見規格問題，究竟要勞動全國人大常委會副秘書長喬曉陽出手，定係由中聯辦出面，完全係兩回事，最後開出嚟牌面係點，要睇普選聯嘅誠意同表現，一切要聽其言，觀其行。
據了解，今年三月北京「兩會」期間，港澳辦最高領導曾經下達新指令，政改方案要過就要高票強勢通過，拉攏唔到普選聯十四票，都起碼要民主黨九票，好似○八年咁想向民主派「打荷包」三、四票先至勉強過骨嘅做法，並不可取。
中央真正着眼嘅唔係方案生死，而係困擾香港多年嘅政改爭拗能否從此偃旗息鼓。所以有知情建制派人士估計，港府叫立法會主席辭職投票，應該係三月之前嘅事囉。
盼政改立場一致
中央有意向普選聯打開溝通之門，立場明確。據悉，當局上星期向普選聯打招呼，叫佢哋有心理準備見中央官員，事態有突破發展。記得四月十四日港府公布冇改政改方案，「喬老爺」喬曉陽下午喺北京幫手遙距推銷，加上喬老爺過往多次南下講政改，要見普選聯，最直接係喬老爺親自出面。
記得喬老爺曾經以「關公戰秦瓊」故事形容與泛民之間嘅溝通，意思係大家要企喺同一平台至有得溝通，唔係就好似三國關羽同隋唐名將秦瓊咁對打。呢個故事套用在當今政改格局，不謀而合；如果普選聯否決政改方案立場強硬，同中央處身不同平台，點溝通？
不過消息話，特區政改循序漸進，中央官員與普選聯溝通亦要循序漸進，按當前情況，最大機會見普選聯嘅，可能係中聯辦官員。如果普選聯自亂陣腳，好似四月十四日同「公投派」議員咁排排企狠批政改方案，與會嘅「中央官員」官階可能更低。若然普選聯有誠意支持方案，喬老爺最後才會自己出面。總之一切存在變數，好戲在後頭！
民主黨主席何俊仁同普選聯召集人馮偉華都承認收到將與中央官員見面消息，但強調時、地、人就乜都未知。普選聯周四將與政制及內地事務局局長林瑞麟見面，普選聯方面話將談及中央官員會面嘅事。