中環耳目：EQ歎貴德宮的骰私房素菜
食素多年嘅政壇新星葛珮帆（EQ），廿三年前為咗唔想傷害動物而食素，結果換來健康身體，連帶皮膚都滑一滑，即使近距離檢視，都一樣係零毛孔，真係恨死好多愛膚之人。
EQ最近完成港大社會科學系嘅婚姻與家庭治療碩士課程，早幾日佢好友兼黨友、深水埗區議員鄭泳舜（Vincent）相約EQ去佢鍾情嘅「貴德宮」食私房素菜慶祝，點知畀EQ靜雞雞埋咗張單。EQ話佢好推廣食素，難得黨友得閒一齊食飯，當然要介紹好嘢畀佢。
多美女明星捧場
位於灣仔道140號明豐大廈嘅貴德宮開業八年，除咗EQ之外，李嘉欣、周汶錡、周麗淇等美女都係捧場客，負責主理嘅馮太話，午巿有八餸一湯加甜品，晚巿就多一個餸兼有糖水，每碟分量都細緻的骰，絕不誇張。味道方面，每一個餸都會用上唔同嘅烹調手法同醬汁調味，加上佢哋走私房菜格局，客人無得自己點菜，不過馮太每次都會安排新菜式畀佢哋，所以一個月嚟幾次都唔會悶。食材方面，鮮菌由新西蘭入口，乾菇就用福建武夷山嘅出品。
EQ同Vincent今次以清新嘅柚子沙律及小樹耳海珊瑚壽司拼盤作開始，酸酸甜甜令人食欲大增，之後湯餃、炸物、老火湯輪住上，最後以咖喱雜菜飯作結，每一道菜嘅味道與質感都有明顯分別。當中值得推介嘅「芝士焗彩菌批」，造型精緻，用上多種菇類，再配上薄薄嘅芝士鮮焗，相當惹味。