中環出更二：吳文華星級座駕新車落地
立法會秘書長吳文華（Pauline）終於有新車用嘞。Pauline早前向行管會提議，畀佢部舊萬事得房車退役，換成豐田豪華七人車，爭取多時，新車日前終於落地，已交到Pauline手中。
掛上「LC2」車牌嘅銀色豐田ALPHARD混合動力環保新車，上個星期已亮相立法會停車場，泊咗喺主席坐駕「LC1」隔籬，隨時候命。部車有2400㏄，最搶眼嘅係車頭嗰一對十足鷹眼咁銳利嘅車頭燈，卓妮都忍唔住望多兩眼。
方便同事議員外出
豐田ALPHARD喺香港無人不曉，好多城中名人、明星、企業家都係捧場客，豪華車廂係ALPHARD一大標記，今次Pauline嘅新座駕都唔例外，內籠寬敞舒適，但非常慳油，符合環保原則。
買咁大部車，咪以為係Pauline貪心，查實佢賣身畀立法會，甚少坐車外出。今次換新車，無非為立法會秘書處同事與議員着想，等佢哋出去開會或搞活動時，可以坐多幾個人。