中環出更一：劉詩昆high tea保鏢傍實

劉大師舊年年頭同太太有爭執，仲搞到有肢體碰撞要報警，其後二人辦理離婚手續，之前劉大師為音樂會舉行記招，話離婚手續基本辦完，但仲有法律問題，所以唔能夠多講，只強調官司無影響佢嘅工作。

不過對於自己嘅人身安全，劉大師就緊張好多。記得當日下午四點，卓妮見佢同位女士喺Landmark Cafe飲下午茶，身邊唔見鋼琴公主孫穎，反而門口有三個保鏢分散喺門口企開等佢。三位保鏢嘅警覺性仲好高，見到二樓有記者，即時用耳機互通消息。

劉詩昆（中）早前與鋼琴公主孫穎（左二）等，為下月音樂演唱會召開記招。 （資料圖片）

早前一個下午，劉詩昆同一位女士喺置地飲下午茶。

品字形排開難埋身

等到劉大師埋完單出嚟，其中一個攞住膠袋嘅保鏢即時上前接過大師手上嘅文件套，然後三個保鏢「品」字形排開，一個喺前面開路，兩個一左一右殿後保護。落電梯時，殿後嘅保鏢仲特登行遠幾個身位，莫講話人，真係連蒼蠅都埋唔到大師身。

卓妮八到，出動保鏢護駕，通常一個team有五個人，前後左右四個人包圍住老闆，再加一個殿後IC（指揮），負責睇住大圍環境。

喺香港做保鏢，現時唔少都曾經做過G4，受過正統嘅保護要人訓練，呢類高質素保鏢，起薪點通常都有三萬五千蚊一個月。

換言之，大師係咁意出嚟飲餐茶，每月起碼都要帶住十萬蚊同行，認真唔講得笑。不過大師昂藏七尺，突然咁高調要搵保鏢保護，唔知係嫌香港唔夠安全，還是離演出日子日近，恐防有不速之客呢？