政情：馮永業過機管局靠「食力」
馮永業（Wilson）早前辭去生產力促進局總裁職務，跳槽去機場管理局做企業發展執行總監，事業平步青雲。不過有人話佢係煲呔曾愛將，亦有人話係身兼行政會議成員嘅機管局主席張建東點名推薦佢坐呢個位。Wilson尋日就向傳媒自爆，話佢係透過公開招聘先爭到機管局個位，仲話人哋係因為睇中佢多年做航空事業嘅經驗先請佢喎，擺明要洗脫「靠關係上位」嘅形象。
Wilson近年是非同閒話都唔少，不過佢睇嚟冇包袱，尋日打破沉默，話自己早年一直負責航權談判嘅工作，不時代表香港同外國談判，仲話自己離開政府之前，喺經濟局負責有關機場嘅研究，所以對航空呢方面可謂有相當豐富嘅經驗，相信機管局都係睇中呢點先至請佢喎！
有情意結 期待返新工
做咗咁多年同航空有關嘅嘢，Wilson話佢對航空唔多唔少都有啲情意結，所以都幾期待返新工。佢話上任後嘅首要任務，主要係探討機場未來嘅發展，同埋開埋第三條跑道嘅可行性。Wilson到底係有料定有關係，大家到時可以拭目以待嘞！