政情：陳繁昌邊寫論文邊跳繩
科技大學校長陳繁昌上任冇耐就同學校師生打成一片，箇中秘訣原來好簡單，就係靠做運動喇。有宿舍今年重點推廣跳繩，負責推廣活動嘅同學尋日喺午飯時間搵埋陳繁昌喺學校大堂跳大繩，希望上行下效，將勤做運動風氣傳遍校園。
陳繁昌尋日跳起繩嚟有板有眼，原來係平時訓練有素，佢笑言讀大學時一寫論文就要幾個鐘，所以寫到攰攰地就會攞條繩出嚟跳吓，話做啲帶氧運動可以增強記憶力，有時仲會玩埋拋波仔，等個腦鬆弛吓。
運動健將 樣樣皆精
唔講唔知，陳繁昌原來係運動健將，足球、網球都好耍家，佢由中學至大學都係足球隊成員，中學時仲攞過校際賽冠軍。至於網球，佢話幾十年前網球仲係一項貴族運動，香港冇乜網球場，所以去到美國先學打網球，一打就愛上。
陳繁昌入主科大後經常以球會友，周末會同同事踢波，逢星期二、四、六就會同學生、教職員打網球，佢哋仲好有系統咁有個科大網球龍虎榜，陳繁昌短短幾個月就已經打上龍虎榜六至七位，佢笑言，出完一身汗再同師生食吓嘢、傾陣偈，自然就熟落起來。