政情：Eva鄭教女變「常哦」
平時只談公事少提家庭嘅運輸及房屋局局長鄭汝樺（Eva），喺母親節前夕做咗個電台錄音訪問，暢談同媽媽、兩個囡囡三代嘅母女相處之道。咪睇局長一臉嚴肅，喺八十二歲嘅媽媽面前，一樣只係小朋友，而喺兩個女面前就變「常哦」，事關佢成日叫囡囡早啲瞓。
Eva喺節目中讚自己父母好開通，雖然兩老想佢讀法律，不過見個女想讀社會學，最後亦由得佢自己揀。後來入咗大學，局長又話要去非洲旅行，父母隔住電話嚇呆咗十秒，嗰時係上世紀八十年代，唔係好多父母接受到單身女仔去到咁遠，不過最終都無反對，只係提醒阿女記得打電話返屋企。
Eva喺父母身上學識「放手」，由得兩個女自由發展，但有時真係忍唔住變「常哦」，會催促佢哋早啲瞓。不過囡囡依家已經分別係二十同廿二歲，想哦都唔哦得咁多，局長惟有學習忍功。反而青年置業「上車難」嘅問題，佢又唔係咁擔心兩個女，佢話最緊要計算自己嘅能力去到邊就得嘞。