政情：鄧長政瞓身青商會
國際青年商會香港總會早前舉行慶祝六十周年餐舞會，政壇嘅俊男行政會議非官守議員召集人梁振英（CY），同埋美女沙田區議員龐愛蘭（Scarlett）都畀足面去撐場。原來佢哋都曾經獲得「十大傑出青年」獎項，Scarlett更加係現任香港傑出青年協會主席，而呢個人氣活動嘅搞手正係青商會。
青商會香港總會長鄧長政（Gene）當晚忙到飛起，佢話佢哋總會長係一年一任，所以今年實要瞓身做好青商會嘅活動，事關商會成立嘅目的係培訓年輕人嘅領導才能。Gene嘅父親鄧兆偉當晚都有出席活動，佢係三十年前嘅總會長，佢笑謂希望三十年後輪到孫仔做總會長，不過佢新抱仲未夢熊有兆！睇嚟Gene要努力啲嘞！