政情：IQ博士為拉票忽然高調？
人稱「IQ博士」嘅中總代表黃宜弘最近忽然高調，繼前晚喺上海大宅設宴招待立法會上海世博團團友，大打感情牌後，尋日又喺電台英文節目撰文，為保留功能組別護航，一改「懶懶閒」形象，睇佢嘅姿態，同我哋聽聞立法會主席一旦出缺，由佢挺身接上嘅講法，不謀而合。
IQ博士之前兩次競選立法會財務委員會主席，都有建制派議員倒戈，被劉慧卿爆冷擊敗，唔知係咪呢個緣故，IQ博士有備無患，為競逐立法會主席做定拉票工夫。做議員首要有表現，IQ博士自知呢樣係自己死穴，難得佢知難而進，尋日喺電台節目力撐功能組別，立場鮮明，咁啱咁蹺，之前建制派倒戈事件，疑似內鬼大多又係功能組別議員，真係巧合嘞。
其實，IQ博士前晚殷勤請議員同僚食飯，今日議員回請上海市接待單位，佢又話攞十斤茅台請同僚飲，爭取感情分，攻勢強勁。佢咁活躍，唔知係咪提醒同僚佢嘅存在，立法會主席一旦出缺，唔好唔記得佢。