政情：羅智光：立會似政府媽媽
立法會議員上海世博團尋日繼續第二日行程，參觀咗六個展館，適逢母親節，政制及內地事務局常任秘書長羅智光設午宴招待大家時，不忘賣口乖，祝一班已為人母嘅女議員母親節快樂，多謝佢哋不辭勞苦嚟到上海。羅智光仲話，立法會好似特區政府嘅母親添，唔通特區高官畀議員折騰得多，令佢成日諗起細個時食阿媽藤條炆豬肉嘅慘痛情景？
議員話似阿爸多啲
羅智光話，對特區政府嚟講，立法會嘅角色就好似阿媽咁，因為港府要用錢，須經立法會撥款，就似阿媽畀錢仔女用一樣喎。嘩，港府申領撥款動輒億億聲，但係施政又唔見好得去邊，按羅智光嘅邏輯，特區政府係個好唔生性嘅忤逆仔嚟喎。所以，有議員亦即時反駁話，立法會似港府阿爸多啲，成日打仔嘛！
立法會內嘅母親級議員，好似自由黨主席劉健儀、前保安局局長葉劉淑儀、專業會議梁美芬、經濟動力梁劉柔芬同民建聯李慧琼咁，全部都有參加世博團，尋日羅智光生硬咁將世博團同母親節拉上關係，唔知一眾母親受唔受落呢？