政情：議員識歎九月搶遊東瀛

研究工廈改建龕堂

近日香港民怨四起，其中一個政府搞極都搞唔掂嘅問題，係立法會議員王國興所講嘅「陽宅貴、陰宅難」，政府話研究將工廠大廈改建為多層式骨灰龕堂，不過到依家仲係冇乜聲氣。有見及此，由民主黨李華明（肥仔明）牽頭嘅食物安全及環境衞生事務委員會就打算九月去全亞洲以高樓大廈做骨灰龕堂做得最成功嘅東京考察，希望可以吸取到當地搞骨灰龕堂嘅精髓，取長補短，盡快解決本港墓地短缺嘅問題。

肥仔明仲會帶一眾議員去埋北海道睇當地漁業嘅發展，話要睇吓會唔會為本港日漸式微嘅漁業帶嚟啟示喎。北海道漁業表面睇同香港好唔同，去考察啲乜嘢實在較難理解，如果話去北海道考察魚生嘅質素，可能仲直接啲。

立法會議員一向好熱心搞考察團，不過就未必團團都順利成行。好似要去歐美睇海濱規劃嘅考察團咁，籌劃期間多多阻滯，由上年拖到今年都仲未去得成。不過日本肯定係個好好嘅目的地，相信好快就會成團。

無獨有偶，衞生事務委員會都計劃喺暑假，由委員會主席、衞生服務界代表李國麟領軍，去日本研究當地醫療融資同保險制度嘅運作。不過大家可能會覺得奇怪，要研究醫療融資問題，睇文件可能仲清楚啲，點解仲要花錢去考察呢？