中環耳目：鄧鉅明沉醉夜上海甜品
太子珠寶主席鄧鉅明（Jimmy）經常笑臉迎人，梗係家庭事業樣樣稱心如意嘞！早前卓妮喺馬場撞到Jimmy，佢話下月會首次舉辦「太子珠寶鐘錶精英盃」賽馬。諗番短短廿年時間公司就有咁好成績，Jimmy真係飲得杯落，但佢話自己好怕寂寞，老婆唔喺度自己就會去夜上海「偷食」！
推介「脆脆布甸」
大家千祈咪誤會，Jimmy係話去馬哥孛羅香港酒店六樓嘅夜上海餐廳狂食甜品。事關佢勁鍾意呢度嘅甜品，笑謂：「如果老婆喺度就唔敢食，老婆唔喺度就猛咁食！」佢極力推介所有甜品，單係布甸就有六、七種，有黑芝麻焦糖布甸、椰果西米布甸，又有Jimmy形容為「脆脆布甸」嘅香米布甸伴雪糕，卓妮見佢好投入咁如數家珍，沉醉個樣都幾搞笑。
除咗甜品之外，Jimmy都好鍾意佢哋嘅椒鹽黃花魚同埋素菜包，笑謂自己好為食，已經幫襯咗夜上海好多年，所以食到個肚腩咁大。
夜上海好受食家歡迎，佢哋由用餐環境到食物，都提供咗與傳統上海菜館唔同嘅感受，難怪連地道廣東人嘅Jimmy都咁沉醉。
卓妮