中環出更：舊米蘭站老闆着潮服巡舖
要數城中時尚潮男，卓妮實投米蘭站主席兼行政總裁姚君達（Byron）一票。卓妮尋日下午見到Byron着住一身佢至愛嘅日本名牌COMME CA MEN去尖沙咀巡舖。Byron話，依家係「人民幣萬歲」嘅時代，佢親眼見識唔少內地豪客落嚟香港掃貨嘅奇景，所以正密謀揮軍上海。
Byron話，日本人當名牌手袋係必需品，香港人用名牌係一種習慣，但內地人對奢侈品嘅態度係「炫耀」，最好係有錢都買唔到嘅限量版添！曾經有個內地客喺米蘭站狂掃十三個售價三十萬嘅名牌手袋，豪花五百萬元，目的係用作公司周年晚宴抽獎之用，出手之豪爽令人大開眼界。所以依家佢最重視內地市場，繼首間分店喺北京開幕之後，年尾就會正式進駐上海。
東京掃COMME CA MEN
米蘭站用咗短短九年時間，由一間百幾呎嘅二手名牌袋寄賣店，發展到依家本港有十間分店，一年生意額逾五億元。Byron就由一名中三畢業嘅流動小販，搖身一變成為億萬富翁，佢嘅成功故事成為唔少後生仔取經借鏡嘅教材。咁公司會否上市？Byron笑謂，暫時未有具體打算。
Byron身在潮界，品味自成一格。尋日佢着住件黑色西裝襯及膝褲，望落既輕便又有型。不過佢腳上嗰對白色尖頭皮鞋最引人注目，Byron笑謂：「鍾意佢夠潮，夠牙擦！」
原來佢由頭到腳都係COMME CA MEN出品。三年前佢喺東京發現呢個牌子，從此一見鍾情。
佢盛讚佢哋嘅剪裁啱身，着到個人夠slim同埋充滿朝氣。不過香港冇專門店，所以佢要專程去東京掃貨，依家屋企擺滿晒呢個牌子嘅衫褲同埋鞋，多到數唔晒。
卓妮