政情：王坤寸煲呔曾治標不治本

煲呔曾話要進行為期五個月嘅資助市民置業諮詢，但暗示復建居屋仍然無得傾。公屋聯會主席王坤尋日喺電台節目上，就嘲諷煲呔曾係「萬金油特首」，毫無遠見，令老百姓非常失望，尤其無咗居屋呢個邁向置業嘅社會階梯，社會怨氣肯定愈來愈大。佢話當初係政府將居屋推向私樓市場，與私樓出現重疊甚至炒賣，一切都係政府嘅過錯；依家政府竟然仲敢話復建居屋會對私樓市場有幾大影響，簡直賊喊捉賊，真係豈有此理！