政情：陳南祿唔知幾時履新
太古（中國）主席陳南祿今年中就會與老僱主講拜拜，過檔恒隆集團展開人生新一頁。貴為馬會大董嘅祿哥，尋日喺沙田馬場現身睇賽馬，一問起佢新工嘅事就笑笑口話唔知，仲拎起部相機影番記者轉頭，心情勁靚。
祿哥上個月中突然宣布請辭，結束同太古長達三十三年嘅賓主關係，呢個請辭將會喺今年七月一日生效，當時好多人都覺得驚訝。一個星期之後，謎底終於解開，原來佢會轉投陳啓宗旗下嘅恒隆集團同埋恒隆地產做董事總經理，當時恒隆亦出咗通告話，陳南祿今年七月十五日起出任新職。
不過尋日喺馬場撞到祿哥同太太伍淑恩，問起佢幾時返新工嘅時候，佢笑笑口話暫時都未知，都係等候公司安排咁啦，似乎對新工嘅嘢唔想多講。之後仲拎起手上部Nikon數碼單鏡反光相機影番記者轉頭，又講笑話同記者「互相輝映」喎！講公事就口密，講到囡囡就成個唔同晒，祿哥話雖然囡囡仲考緊會考，不過聽日母親節照樣會陪媽媽食飯慶祝，孝敬母親，幾時都唔少得！