政情：肥亨話當年勉勵80後

肥亨憶述當年回流香港前，一直喺外國做事，但原來佢啱啱出埠工作時，所遇到嘅挫折都不比做官時少。肥亨七三年喺港大畢業後，加入美資嘅大通銀行做見習生，三年後就被上司推薦咗去紐約總行工作。佢尋日自爆，當年得悉自己可以去紐約時，感覺好飄飄然，誰不知去到美國後，竟然日日畀上司鬧到飛起，搞到自己自信盡失；加上對美國地方唔熟悉，有次佢個客人講起美國嘅牧場Sterling，佢仲以為人哋講緊英國嘅同名城市添，認真瘀皮。

之但係佢冇放棄，仲決定用努力補救，每星期六日都例牌拎罐可樂返公司睇文件同美國地圖，佢幽默話：「嗰時都仲未有健怡可樂㗎，都唔知呢個係咪就係我嘅致肥原因！」年半後，肥亨成功向上司證實咗自己嘅能力，仲升埋職添。

尋日個講座仲有段小插曲。話說城大嘅公關司儀介紹肥亨時，竟然稱呼佢為「前財政司司長」，肥亨即時耍手擰頭話唔係，但司儀似乎唔知佢真正嘅銜頭係咩，仲死撐話：「雖然個銜頭可能係加上去，但佢做嘅嘢都相當於司長㗎喇……」搞到大家滴晒汗，都咪話唔尷尬。