政情：曾智雄撐陳仲尼接棒
全國青聯今年七月換屆，全國青聯向來被視為年輕一代上位嘅跳板，邊個入到去，自然係大家所關注。跟據過往傳統，喺全國青聯領導層中，香港青聯都有代表做全國青聯副主席。依家做緊副主席嘅前人大常委曾憲梓二仔曾智雄（William）同「新金王」全國政協委員黃英豪即將卸任，到底邊個會做新血呢？
眾所周知，香港青聯中不乏實力雄厚嘅名人二代，有傳今屆主席陳仲尼（Rock）將順理成章更上層樓，接棒做全國青聯副主席。早前William同Rock出席《香港五四青年節2010》活動時，兩個鬼咁好傾。不過William話，邊個接棒未到揭盅都唔知結果，但香港青聯一定會力撐Rock做全國青聯副主席。據聞菁英會主席施榮忻係另一熱門。
撐完兄弟，太太喺七月預產嘅William話，搵咗香港青聯常務副主席葉振都個婦產科太太幫手接生，William話有熟人睇住，佢都放心啲，仲話等太太坐完月，九月齊齊去睇世博玩幾日慰勞太太。至於啱啱榮升第二任爸爸嘅香港青聯副主席秦善文（Samuel），自天匯事件後好似「潛咗水」，William話老友並無失蹤，只係呢排生意好忙，加上尋日睇升旗要六點起身，平時佢哋六點都未瞓，所以先冇現身。