政情：議員搭高鐵嫌座位窄
立法會世博團尋日浩浩蕩蕩拉大隊去上海，為咗畀議員一嘗坐高鐵嘅滋味，世博團兜咗個大圈，海、陸、空交通工具都坐齊，十三個鐘先到上海，真係坐到腰骨都硬埋。不過今次高鐵之行似乎未為一眾議員留下良好印象，事關一行人搭嘅係二等艙，唔少議員覺得座位之間嘅距離太窄，搞到全程都伸唔直隻腳。好彩坐高鐵比坐飛機自由，大家可以周圍參觀吓，仲入埋駕駛艙影相添！
唔少議員今次係第一次搭武廣高鐵，當中包括工聯會黃國健（KK）同資訊科技界代表譚偉豪（Samson）。KK話高鐵真係好快好定，比起歐洲之星同日本新幹線仲要快，美中不足係座位太窄，加上行車時有唔少噪音，影響舒適度。
Samson都覺得座位窄係一個大問題，但就話速度可以彌補呢方面嘅缺陷。身為IT專家嘅Samson仲發現，高鐵沿線嘅電話訊號收得好差，呼籲當局快啲改善，否則可能影響返大陸公幹嘅專業人士搭高鐵。
四小時嘅高鐵車程中，立法會秘書處仲安排咗內地鐵道部同港府工程師講解高鐵規劃，不過可能十三個鐘嘅舟車勞頓太辛苦，唔少議員喺高鐵行咗一圈後都瞓晒覺，變咗冇乜人聽書。今、明兩日嘅行程都係密麻麻，睇嚟班議員要分秒必爭，爭取時間休息嘞！