政情：長毛惡搞D0NALDPK害埋自己

長毛喺年初向運輸署一併申請兩個暗含疑似不雅英文詞彙嘅自訂車牌，分別係諷刺行政會議召集人梁振英（CY）嘅「CYUSH0」，及詛咒煲呔曾（Donald）嘅「D0NALD PK」。「CYUSH0」早喺三月獲批准拍賣，只係長毛遲到錯過競投。至於「D0NALD PK」就不獲批准，但後來經長毛改為「D0NALDPK」後，終於獲准喺尋日公開拍賣，長毛亦準時到拍賣會競投。

畀人鬧搞破壞心胸窄

「D0NALDPK」底價為五千元，每口價一千元，長毛一心諗住第一口價就捧走個車牌，可惜事與願違，有人加入競投，不斷同長毛鬥叫價，一直叫到一萬七千元才收手，雖然車牌最後由長毛投得，但成交價就比底價高出一萬二千元。長毛事後大呻買貴牌，仲自爆叫到一萬七千元價位時已開始縮縮哋，如果再叫高啲就會放棄競投喎，長毛今次真係害人終害己囉！

長毛聲言競投自訂車牌只係想幫港人出番啖氣，希望港人睇到個車牌會會心微笑。不過，同佢爭奪車牌嘅優質幸運車牌中心負責人顏文翰就開門見山話，長毛玩人就要付出代價，佢唔應該破壞香港繁榮穩定，搞咁多鬧人嘅車牌，只會顯得佢心胸狹窄。被問到競投背後係咪有人撐腰，顏文翰就話：「如果我有人撐，叫價叫到十幾萬都同佢（長毛）爭啦！」

雖然長毛今次以高於底價一大截投下惡搞車牌，但佢話上次因為遲到而錯過競投嘅「CYUSH0」車牌，牌主打算將車牌以當日嘅競投成交價五千元轉讓畀佢，過戶費就由長毛繳付。其實呢啲咁有政治目的嘅車牌，即使投到都好難甩手，賣番畀長毛好過放喺度鋪塵啦！長毛有份參加5.16新界東補選，同區參選人仲有周澄、陳國強及胡世全。