中環出更：韋國洪歎大圍脆皮乳鴿
潮流興集體回憶，連飲食都要懷舊。講到「懷舊菜」，與立法會議員林大輝老友鬼鬼嘅沙田區議會主席韋國洪，就推介屹立沙田三十幾年嘅大圍萃華酒家（前稱「瑞華酒家」）。萃華酒家與隔鄰嘅楓林小館多年來被封為「沙田雙寶」，紅燒乳鴿響噹噹，滑漏嘅山水豆腐花更是家喻戶曉。
多政商名人捧場
身為沙田原居民嘅韋國洪憶述，當年萃華與楓林、小欖公齊名，於沙田舊墟開業（現為沙田廣場一帶），七九年萃華跟隨楓林搬到大圍現址開業，屹立至今，政商界名人食客依然不絕，好似教育統籌委員會主席鄭慕智、冠軍練馬師「食力簡」簡炳墀、立法會議員葉劉淑儀、前立法會主席黃宏發、歌神許冠傑等。韋主席睇番萃華開幕舊相片顯得非常雀躍，仲指住相中嘅主禮人話：「呢位咪係當年嘅沙田區議會主席吳燦林囉！」
「萃華」嘅懷舊招牌菜有紅燒乳鴿、椒鹽吊片、炸釀豆腐、桂林炸蝦丸、蝦子柚皮等，甜品就有山水豆腐花，並配備傳統黃糖。韋主席最鍾意係紅燒乳鴿及椒鹽吊片，佢大讚乳鴿皮脆肉嫩，肉汁豐富，十分香口。
萃華酒家經理知道韋主席幫襯，早就預備一條約斤半重嘅海紅斑。韋主席話，海紅斑來自南沙水域，可遇不可求，肉質爽夾甜，鮮味十足，細條清蒸，大條兩味，包括紅燒及炒球。不過，一分錢一分貨，海紅斑每両六十二元，價錢較青斑貴兩倍有多。據聞「新食神」葉澍堃（Stephen）早幾日都同屋企人幫襯過萃華酒家。
卓妮