中環出更：施家媽媽屋企地位超然
今日係母親節，亦係一眾孝順仔女孝敬媽媽嘅黃金機會。卓妮尋日就撞到菁英會主席施榮忻(Jamie)、佢爸爸施子清同兩位大哥四個男人齊齊入馬場，但偏偏媽媽就冇同行噃，莫非佢哋有心撇甩媽咪講男人經？非也！Jamie解釋，佢哋已經約咗媽媽晚上一齊去馬車會，提前慶祝母親節添！
講起媽媽，施家幾兄弟你一言我一語講唔停口。大哥施榮怡話，媽媽喺屋企嘅地位就好似國家嘅總書記咁，爸爸頂盡都只係副主席咋喎。佢仲話媽媽要湊大佢哋幾個反斗星一啲都唔易，佢憶述話：「當年媽媽要拖一個、孭一個、抱一個咁去買餸煮飯，仲要煮埋大鑊飯畀工廠班工人食，都咪話唔辛苦！」
榮懷慶幸食母乳
身為廠商會副會長嘅二哥施榮懷就話佢係幾兄弟之中最好彩嗰個，因為佢係唯一一個有幸食母乳大嘅，佢記得：「大佬本身都係食奶粉，但我出世時家境唔係咁好，所以要轉食母乳，每次諗起都覺得媽媽好偉大！」Jamie就話，最難忘媽媽對佢嘅教導，仲大爆佢媽媽出嫁前，原來係水都唔識煲嘅千金小姐一名，所以佢咁多年嚟一手一腳將頭家打理得頭頭是道，一啲都唔易。
施家幾兄弟各自買咗份禮物送畀媽媽。大哥榮怡名下愛駒「愛拚者勝」，尋日亦都喺第五場贏出，為佢帶來35萬獎金。一家人開開心心咁拉頭馬，為母親節錦上添花！
卓妮