政情：余志穩客串執教鞭
退休前廣受好評嘅前社會福利署署長余志穩「阿魚」離開官場已差唔多九個月，不過佢嘅退休生活一啲都唔「他條」，尋日佢就幫私隱專員吳斌出席保障私隱嘅宣傳活動，向長者呼籲小心保護個人資料，佢仲透露，雖然已退下火線，但佢退而不休，間中擔任兩間大學客席講師，向後輩分享一下為官多年累積落嚟嘅心得。
余志穩退休後一直不時做義工，依家幫緊浸大同理大做客席講師，每季客串一、兩堂，講下社會貧窮同市區重建嘅問題，下個星期仲會去浸大同學生討論社會企業課題。佢透露，自己一路都好想執教鞭，如果有機會都唔介意做下兼職講師，仲希望講番自己「老本行」，同學生分享下有關社會政策等課題。
一本正經嘅「阿魚」亦好鍾意去旅行，退休以來已經去過日本、泰國同新加坡，上個月仲同太太去咗蘇梅島過二人世界，住當地嘅精品酒店，享受陽光與海灘。佢話呢個地方係個女度完蜜月之後介紹佢哋去，當地氣氛好浪漫，今次同太太把臂同遊，實行度多次蜜月。