政情：行會成員5.16吹無定向風

金刀梁：到時話你知

尋日行政會議如常開會，不過似乎無乜具爭議性嘅嘢要傾，個會開咗一個鐘多啲就玩完，一眾行會成員亦面帶笑容咁步離政府總部。

問張建東五一六去邊，佢話仲未知當日會唔會喺香港，至於會唔會投票佢就無答到。跟住落嚟嘅行會成員鄭耀棠話，佢「可能唔喺」香港喎。

接住落嚟嘅行會成員有胡紅玉同埋梁智鴻，胡紅玉就估計到時佢應該喺香港嘅，不過去唔去投票就到時先至考慮啦！至於梁智鴻就答得好鬼馬，問到佢會唔會去投票時佢竟然話「到時話你知！」

計埋早前表明五一六不在港嘅查史美倫同埋夏佳理，仲有唔知自己當日會去邊嘅楊敏德同劉遵義，即是過半行會非官守成員一係就唔知去邊，一係就會遠走他方，呢個行會真係有隊形嘞。