政情：地方峰會 靜雞雞押後

○八年首屆地方行政高峰會議喺五月十日舉行，照計係時候再開鑼，但至今無聲無氣。有知情人士透露，陳甘美華早喺今年三月已向十八區區議會主席提及續辦高峰會一事，但未觸及具體安排，其實當時距離五月只剩下一個多月，若如期舉行，根本唔夠時間籌備，其後先知道原來政府早已變陣，秘密將高峰會押後到七月二十一日喺灣仔會展舉行。

避補選敏感日子

其實政府決定將高峰會延遲兩個月舉行，完全不難理解，事關如果今年高峰會安排喺五月舉行，距離立法會補選投票太近，高峰會勢必被泛民主派騎劫，成為催谷投票嘅最佳平台，當局為免幫泛民造勢，都係押後為上策。不過，避得過補選，又要面對七月十四日立法會表決政改方案。

其實煲呔曾為通過政改方案，不惜以取消區議會委任制做籌碼，企圖換取泛民支持政改方案，隨即被委任制下嘅區議會主席炮轟，批評政府將委任議員當為籌碼，剝削委任議員嘅投票權，漠視委任議員嘅貢獻。橫掂好多委任議員任期將近屆滿，到時大可以無顧慮喺高峰會上暢所欲言鬧個夠本，為免煲呔曾到時丟架，德成局長同陳太惟有變招，將峰會延至七月二十一日舉行。

除咗延遲開會日期，今次連開會形式都改埋，事關兩年前首屆高峰會分組討論安排惹來好多區議員批評，指大家未能暢所欲言，所以今年會先在六月開始喺全港五個大選區舉行分區諮詢會，分別就小型工程、保育、文娛活動等多個範疇討論，並由相關政策局官員回應問題，先化解地區人士嘅不滿，為高峰會卸咁啲力。德成局長同騰雞美華今年提前拆彈，希望唔使又好似兩年前首屆峰會咁臨時改主題啦！