中環出更（二）：趙金卿Prada草織袋渾然天成
金融海嘯後身家不減反增嘅名媛趙金卿（Kathy），近年喺香港社交圈轉趨低調。早前卓妮見佢一身春夏新裝打扮入馬場，手挽着Prada最新款棕褐色草織流蘇手袋，襯條Prada裙子，打扮既端莊又洋溢大自然氣息，令人眼前一亮，原來個手袋係佢歐遊嘅最新戰利品！
火山爆發 歐洲「走難」
不過講到歐洲之旅，Kathy心有餘悸。原來佢早前應邀參加奧地利公主嘅生日宴會，點知撞正冰島火山爆發令歐洲空中交通癱瘓。為咗返香港，Kathy喺歐洲既轉機又駁車，兜兜轉轉幾個國家先至返到嚟，歐洲五日遊焗住變咗十日遊，難怪佢話好似「走難」咁！
不過Kathy冇忘記shopping。佢話個Prada手袋唔係成件真皮打造，夠晒輕身，設計又新穎。個袋頂部仲有流蘇設計，肩帶又吊住一個花環，好有回歸田園嘅感覺。Kathy出身金融界，扮靚自有主張，買嘢裝身都唔會獨愛一個品牌，好似當日着對LV高踭鞋，手錶係近年先至生產女裝腕錶嘅Franck Muller，品味自成一格。
卓妮