中環出更（一）：立會多古董見證百年變遷
立法會下年年尾就會搬去添馬艦新總部，係時候諗吓立法會大樓嘅舊傢俬應如何處理。大樓連「大葛樓」年代有差唔多成百年歷史，剩係前立法局同立法會亦喺度四分一個世紀，肯定有大量具歷史價值嘅物品，掀動現任同前任議員唔少集體回憶。卓妮對古老物品最有興趣，於是捉住最熟悉立法會大樓嘅自由黨主席劉健儀（Miriam）同立法會秘書長吳文華（Pauline）帶大家行個圈，了解呢座大樓裏面嘅「寶物」。
入咗議會近廿年嘅Miriam帶卓妮喺大樓行咗個圈，話最有感覺係喺大樓頂層吹吹風，因為可以一邊望住象徵公平公正嘅泰美斯女神像，一邊沉思議員嘅責任。Miriam話立法會到處都好有紀念價值，例如立法會宴會廳門口嘅雕花屏風、用嚟掛大褸嘅掛鈎、同埋唔同款式嘅座枱燈等，全部都見證住立法會咁多年嘅變遷。立法會門口嘅保安員櫃位、會議廳前廳嘅大銅鑼差唔多由大樓成為立法機關後就存在，意義非凡。
未決定拍賣或保留
立法會大小事務都由佢統籌嘅Pauline就話，淨係佢嘅辦公室已經有唔少「古董」，好似書枱嘅櫃桶係全木製造，枱面捫上仿皮，枱角鑲嵌咗銅邊，櫃桶嘅銅手抽亦係特製，凸顯殖民地時期上流社會嘅尊貴氣息。Pauline房中嘅竹製百葉簾同枱燈，全部都喺目前已拆卸嘅太古大廈行政立法兩局議員辦事處搬入嚟，肯定唔止有四分一個世紀嘅歷史。
到底唔搬去新大樓嘅物資會點處置呢？秘書處就話仲未決定，但已經搵咗專員記錄低立法會有紀念價值或者歷史意義嘅物資清單，完成後先再決定保留定拍賣，話唔定仲可以喺新大樓劃個空間，將有關物資展出畀公眾參觀添！
卓妮