殺校遺址殘破藏危機

上水石湖墟田料米業商會公立學校○五年遭殺校後，仍然佇立衞平坊上的殘舊校舍現在荒涼一片，門庭深鎖的校園早已雜草叢生，鐵鑄大閘則有嚴重銹蝕，其中一個門鉸便因銹蝕而鬆脫，僅以鐵鏈綑綁。立於行人路上的大閘已呈傾斜、並搖搖欲墜。

居於附近的陳先生每日均會路經衞平坊，坦言有「牙煙」之感，「我睇到道閘爛咗好耐，一直都冇人理，嗰度係去上水站嘅必經之路，平日好多人行，如果道閘真係跌落嚟就大鑊啦！」陳擔心大閘會重蹈去年社會福利署庇護工場鐵閘壓死人的慘劇，希望當局能夠盡早跟進，勿亡羊補牢。

鐵閘門鉸因銹蝕已呈鬆脫，只以一條鐵鏈綑綁。

去年社署轄下庇護工場發生冧閘意外，清潔工人無辜送命。

荒廢多年嘥資源

「嗰度成日都好多學生同市民行過，如果道閘跌落嚟真係大件事！」北區區議員藍偉良指出，上址校舍已荒廢多年，至今仍未有發展定向，而區內亦有多間遭殺學校校舍荒廢逾十年，同樣未有發展藍圖，希望當局能從速規劃，免繼續浪費資源。至於上址鐵閘問題，藍則會向相關部門了解。

立法會教育事務委員會委員梁耀忠則認為，當局對殺校後校舍安排欠缺跟進及維修，不但令土地及資源白白遭浪費，亦令校址衍生維修與治安問題，「政府就係咁，殺咗校就以為冇眼屎乾淨盲，殺完又唔理，到有新用途先嚟慢慢執！」梁指校舍被殺後仍屬政府物業，當局須肩負應有維修及管理責任，而非「殺完就算」。

教育局發言人表示，由於該校收生不足，已於○五年九月停辦，至於校舍則已交回地政總署管理。

陳小姐：「間學校荒廢咗好耐，我行過都幾驚，早排大風我都唔敢行近嗰面，驚有嘢跌落嚟！」

侯小姐：「咁樣爛法，就咁用條鐵鏈綁住點得㗎，呢度成日都咁多人行，真係好危險！」

接獲轉介始補鑊

北區地政處接獲本報轉介後火速進行維修，該處發言人稱，知悉大閘損壞後即時進行維修，有關工程並已完成。發言人又稱，上址已批撥予食物及衞生局，預留將來作發展醫療設備之用。