政情：黑英倡儉樸救地球
尋日對「黑英」林超英嚟講別具意義，因為呢日係佢卸任天文台台長、退休一周年嘅日子，呢日佢都喺個人網誌《草雲居》寫下隨筆。黑英唔係緬懷官場日子，而係講佢做番個平民百姓後嘅生活。都唔悠閒㗎！佢粗略數過淨係演講就做咗逾百場，接受訪問都有三十幾次，咁忙都係想大家更了解氣候變化同生活方式嘅關係，希望大家離開奢華浪費，過儉樸但開心嘅生活。
地球暖化日趨嚴重，黑英喺退休後瞓身推動環保生活，但佢慨嘆環保好難做，事關好多人懷疑「人類進步」點可能走回頭路，言下之意話啲人歎慣咗好難改。黑英語重心長話，好明顯要做好多工夫，先會令到市民明白以依家嘅方式「向前走」係冇路嘅，係走向懸崖，顧名思義係話若然大家再繼續過奢華浪費嘅生活，係死路一條！
黑英話單靠一人之力，唔可能喺人類歷史留下乜嘢印記，但既然活喺世上，就要努力為大眾嘅前途盡一分力。唔知大家聽完佢呢番話之後，會唔會反省吓呢？