政情：林健鋒溝通抗「公投」
由經濟動力牽頭嘅「工商界政改動力」，最近注入專業界力量，正名為「工商專業政改動力」，改咗名，即刻有動向，下星期五舉辦政改論壇，請到立場迥異嘅「政制向前走聯盟」同普選聯嚟開壇論政。經濟動力林健鋒（Jeffrey）話，論壇激辯，唔代表激進，唔怕會刺激公投投票率，反而愈辯愈明，總好過一味吵吵鬧鬧咁話。
建制派抗「公投」各師各法，民建聯敲定喺5.16補選投票日拉隊過濠江，工商專業政改動力繼續就用溝通抗「公投」，五月七日舉辦第二次論壇。不過，5.16逼近，搞論壇怕唔怕炒熱議題㗎？Jeffrey話，唔怕！開論壇志在各抒己見，唔會踩人。本身係立法會總商會代表嘅Jeffrey，言論一向唔係好激，唔似早前反駁社會不和諧民調而被市民狂插嘅「佳叔」劉兆佳咁多口，建制派應該可以放心。
前幾日Jeffrey競逐政改小組委員會副主席，有三名建制派議員倒戈投畀其對手劉慧卿，當時傳出係因為Jeffrey喺預算案表決辯論時要求其他人縮減發言而結怨。重組案件後，確認Jeffrey係清白，其實係當日喺立法會前廳，其經濟動力同僚梁君彥同人講笑，話脾氣唔好嘅人先至會發言講啲講完又講嘅嘢，令同僚誤會佢唔想人講嘢，從政者說話時都係小心為妙！