政情：陳家強求學乜都試
四、五月係香港嘅考試季節，考生喺試場奮戰過後，都係時候要諗吓升學選科嘅問題。財經事務及庫務局局長陳家強尋日話上個月去探訪中學時，與同學們交流當年嘅學習成長路，佢尋日仲將求學之道放喺《局長網誌》同大家分享添。
話說三十五年前，陳家強喺名校聖若瑟英文中學畢業後，攞到獎學金赴美國攻讀經濟學，佢當年入讀嘅美國衞斯廉大學（Wesleyan University）奉行博雅教育，除咗主修科外，學生仲可以按自己嘅興趣讀唔同嘅選修科。陳家強入學時簡直好似劉姥姥遊大觀園咁，見到乜都覺得有興趣，都想讀一讀，結果佢入大學第一年讀過社會學同政治，讀讀吓又想了解美國多啲，於是又去讀美國外交史，並兼讀哲學、美術史等等，搞到冇乜時間花喺主修科經濟學上。
不過，正因為唔同嘅學科令陳家強大開眼界，反而對修讀經濟學有幫助，令佢覺得呢科唔係得數字、理論同圖表，而係着重邏輯分析、思考方法。講到尾，陳家強都係想鼓勵年輕人要趁年紀輕好奇心大，多嘗試，多學習，發掘自己嘅興趣同潛能。